Emisión: 27-05-2011
Dona María Helena García Lorenzo.
naceu o 18 de abril de 1936 na parroquia carballesa de Ardaña.
Iniciou os seus estudios nas “Josefinas” de A Coruña, combinando a formación xeral con estudios de música, chegando a cursar ata terceiro de solfeo. Posteriormente, continuou ampliando coñecementos en Santiago de Compostela, aínda que por razóns persoais tivo que deixar de estudiar.
Xa desde moi nova amosou un espírito solidario, inclinándose polos máis desfavorecidos. Así, colaborou de forma activa na súa parroquia de Ardaña, onde, a pesar dos anos que leva vivindo fóra de alí, segue mantendo contacto coa xente.
Casou co empresario carballés Manuel Belo García, co que tivo tres fillos, e estivo traballando co seu home na empresa familiar.
Foi promotora na creación da Asociación Antidroga Vieiro de Carballo, entidade na que segue traballando e colaborando de forma totalmente desinteresada. Tamén é voluntaria e directiva en Proxecto Home Galicia desde hai máis de 29 anos. Neste senso ten realizada unha labor inestimable en Carballo, onde conseguiu que moitos drogodependentes entrasen en Proxecto Home para rehabilitarse; labor que continúa desenvolvendo de xeito moi activo. Incluso en diversas ocasións acolleu mozos na súa casa. Neste mesmo campo é responsable en galicia de Mundo X, centros de desintoxicación dos pais franciscanos.
Por outra banda, tamén desde hai anos vén colaborando con Cáritas, tanto en Carballo coma en Santiago de Compostela, onde concretamente participa en programas dirixidos ós xoves e de inserción socio-laboral de colectivos en risco de exclusión.
Desde o punto de vista persoal, é unha muller á que lle gusta axudar desde a sombra. Ten un carácter forte, aínda que aberto e alegre. Enfoca a vida desde o lado positivo das cousas e con sinceridade, e non se rende nunca ante un problema. É amante da natureza e dos animais, e é unha apaixonada do baile, tanto que acude tódolos sábados a unha escola de danza.
Tamén lee moito e escribe. Así está rematando as súas memorias, e empezou a escribir un libro baseado en feitos reais, que trata das drogas e as súas consecuencias.
.
Ningún comentario:
Publicar un comentario