A Xunta e trece grandes empresas en Galicia renovaron esta semana o seu compromiso de situar á comunidade como referente en responsabilidade social impulsando este ámbito no tecido empresarial galego.
O conselleiro de Economía, Emprego e Industria, Francisco Conde, mantivo o pasado luns unha reunión en Santiago con estas trece asinas, que integran o Grupo de Representación Empresarial Galego en Responsabilidade Social Empresarial (RSE), informan hoxe fontes do departamento autonómico.
Na firma da renovación desta colaboración acordouse impulsar a participación no grupo de novas empresas e consolidalo dentro e fóra de Galicia.
O Goberno galego, pioneiro a nivel nacional na aposta pola responsabilidade social empresarial, creou en 2012 este grupo formado na actualidade por Congalsa, Feiraco, Gadisa, Grupo Calvo, Grupo Ingapan, Grupo Pontes, Fillos de Rivera, Inditex, Martín Códax, R, Velgalsa Eroski, Premium Mix Group e Profand.
Entre os seus obxectivos figuran establecer as bases para a implantación a gran escala da RSE nas pemes; avanzar no impulso e difusión da RSE na comunidade co obxectivo de alcanzar unha actividade empresarial máis sustentable e competitiva; ou axudar ás empresas para dar resposta aos seus retos e desafíos neste campo.
Na súa intervención, Conde indicou a necesidade de poñer en marcha novas fórmulas de participación que enriquezan a xeración de coñecemento en RSE e a aposta do Goberno galego por seguir mantendo un diálogo aberto co tecido empresarial para difundir entre a sociedade a importancia da RSE.
A Xunta activará proximamente a Estratexia de RSE 2017-2020 da que o conselleiro expuxo as súas principais liñas de actuación para situar a Galicia no eixo do avance cara a un desenvolvemento sustentable; favorecer unha sociedade máis solidaria e integradora; impulsar a competitividade de empresas e organizacións; responder a novas tendencias no campo da sustentabilidade; e favorecer a confianza nas organizacións públicas e privadas.
"A renovación da nosa colaboración co Grupo de Representación Empresarial Galego en RSE permitiranos seguir achegando os nosos coñecementos e nutrirnos á vez da experiencia doutras compañías para seguir xerando valor na sociedade", asegurou Mane Calvo, conselleiro delegado de Grupo Calvo.
Exemplos do traballo neste campo do grupo cita a súa adhesión ao Pacto Mundial das Nacións Unidas ou a Forética, a verificación das súas boas prácticas pesqueiras por un terceiro independente ou a verificación voluntaria das condicións laborais dos seus barcos e os seus sistemas de xestión conforme ao Convenio 188 sobre Traballos da Pesca da Organización Internacional do Traballo.
Ademais, lembra que Grupo Calvo foi a primeira compañía española do sector das conservas de alimentos que se adheriu á Asociación de Comercio Exterior (FTA, polas súas siglas en inglés).
Ningún comentario:
Publicar un comentario